هناء ابراهيم تكتب : هاشتاق آخر الأسبوع
فوق راي ..
##
الإستغلال في إصطلاح حبوبة جيرانا
هو أن يراك الإنسان فرصة قبل أن يراك إنساناً…
تكون عندو معاك مصلحة، فيسميها محبة..
###
الباعوض ضيف ثقيل مزعج غتيت… يزورك بدون موعد، يأخذ من دمك ما يريد، ثم يتركك دون أن يقول شكراً
…
طبعاً دمك بالنسبة ليهو بوفيه مفتوح
التقول وارثك
###
قطوعات الكهرباء:
هي خدمة تذكّرك إنو علاقتك بالراحة مؤقتة، لكن انت ساي شايفها مشكلة…
اشتري ليك إيجابية من سوق الجمعة
###
ما تصلحه المطره والجو الجميل .. يفسده الباعوض
لكن تعالوا ساي…ياهو من الله خلقكم مطبعين مع الباعوض
اجي!
#####
البعض يعتبر حياة الناس مسلسل تركي…
لازم يعرف كل التفاصيل، حتى الحاجات البطل نفسه ما عارفها!
#####
أحيانا تصل آخر الأسبوع
وإنت لا عارف هل أنت تعبت
ولا الإسبوع تعب منك!
لكن قول
الحمد لله… عدّيناها، والباقي على الله…
و……..
يعني كيفن ما بريدك
