هناء ابراهيم  تكتب : هاشتاق اخر الإسبوع 

فوق راي

###

مفقودة في المكسيك قدر ما فتشوا ليها صورة بدون فلتر عشان تساعد في البحث ما لقوا ..

والله جد…

فلتر تقيل…

يا جماعة عدلوا الصور زي ما عايزين… لكن كمان خلوا نسخة للكلام دا ..

ما تخلي الفلتر يخلي العثور عليك أصعب ..

يفلتر أخلاقك قول آمين

…

###

تعطلت الكهرباء في منزل أحد المواطنين فتم تزويده بسيارة كهرباء إلى حين اصطلاح العطل…

اتفرجتوا…

الناس تنفسن يا جماعة…

دايرين يخربوا المواطنين بالدلع الزيادة….

الكلام دا غلط لكن….

اها بعد المواطن يبوظ من الرفاهية والدلع .. ما تجوا تبكوا لينا

بي طريقتكم….

#####

في علاقات التفسير الوحيد ليها إنو الناس ديل مستلفين مشاعر بالربا..

دي ما مشاعر طبيعية

دي مشاعر سوق أسود

وغايتو الناس تحتسب

….

####

تبرطم يعني تقول كلام غير مفهوم في لحظات الغضب والزعل … طبعاً الكلام دا انت عارف معناه والجنبك بخمن معناه….

المهم داير اقول ليكم: الواحد إذا ما ببرطم من عمايلكم دي كان انجلط…

…..

#####

بتكلم مع قريبتنا في خط سير الكلام قلت ليها أبوي قاعد هنا … لكن هسه معاه ضيوف في الصالون …

رجعت لي بعد شويه … قالت لي انت متأكدة أبوك قاعد في الخرطوم ؟!

قلت ليها لماذا؟!

قالت لي الناس قالوا في بورتسودان

قلت ليها معناها في بورتسودان… أنا كمان ح اغالط الناس في أبوي ؟!

اجي !!

######

قال :

لَو كُنتُ أَعجَبُ مِن شَيءٍ لَأَعجَبَني سَعيُ الفَتى وَهُوَ مَخبوءٌ لَهُ القَدَرُ يَسعى الفَتى لأُِمورٍ لَيسَ مُدرِكَها وَالنَفسُ واحِدَةٌ وَالهَمُّ مُنتَشِرُ

وَالمَرءُ ما عاشَ مَمدودٌ لَهُ أمَلٌ

لا تَنتَهي العَينُ حَتّى يَنتَهي الأَثَرُ

و………

يا سلام عليك يا سلام

لدواعٍ في بالي