فوق راي .. هناء ابراهيم (حزب الضلمة ودكان النور )
ربما لاحظت أن لدى المليشيا مشكلة شخصية مع النور كـ طاقة وك علم
إستهداف محطات الكهرباء ….إستهداف الجامعات والمدارس
ما خلوا سلك كهرباء ( في السماء والأرض)…
التقول عندهم معركة مع زر التشغيل..
أكثر سلاح يعمل بكفاءة لديهم هو الحقد والجهل ..
الجهل جندي مطيع ما بسألك لماذا ولا بقول ليك دقيقة نفكر…
الجاهل بمشي معاك (زي البهيمة) والحاقد بتشعلوا كلمة
لذلك يخافون من العلم والنور ..
يخافون من المدارس..
من اي مكان فيهو كتاب ..
الظلام… البرنامج السياسي للمليشيا
الظلام بالنسبة ليهم حليف استراتيجي…
المدارس تبدو هدفاً مفضلا..
مكان خطر… كيف يعني ناس تقرأ وتفكر …
المشكلة التي تواجه خطتهم ما المضادات الأرضية… لا لا….
المشكلة التي تواجههم هي إرادة الشعب السوداني
تقطع الكهرباء بولعوا بطارية
ما لقوا بطارية بفتحوا كتاب… ولو ضاق الحال أكتر بشعلوا الفكرة نفسها…
ودائما بفتحوا طاقة دعوات وصبر ويقين …
النور في السودان ما كهرباء … النور عادة سودانية قديمة
عادة السودان مهما طال الظلام … يجد الضوء طريقه دائماً..
والله جد…
لذلك عليكم الله ما تخلوا منطقة في السودان دا يسكنها الجهل..
السودان بطيب بالوعي والتعليم والمحبة والأخلاق الطيبة …
تاني ما دايرين مناطق ملوثة بالجهل
و…….
بريدو… سوداني
لدواعٍ في بالي
