هناء ابراهيم تكتب : شايلك (حمار الشوق)
فوق راي..
تختلف الهموم ودرجة الشيب والفقد ولكن الشوق واحد …
معظم الناس دي جاها شيب الحرب …
والله جد…
الجنجويد شيبو بالشفع ذاتن
نحن شيبنا من الشوق والحنين والفقد…
ما شوق ساي…
شوق كافر اكتر من الجوع
شوق بكاي ولا بتحنس…
شوق اكس لارج …
انت m ولابس شوق اكس لارج
شوق اكبر منك
اكبر من المسموح به…
نسبة شوق لم تصرح بها وزارة الصحة
شوق اوفر دوز
والله جد…
مشتاق تقيف للمواصلات جنب بيتكم
انت مشتاق للكمساري والزحمه والكلاكلة والميناء البري..
مشتاق لصوت ساره محمد عبدالله الصباااااح رباااح
مشتاق لصينية بري وشارع المشتل و١٣ شرق النيل والشهداء والمحطة الوسطى والسوق العربي
مشتاقة تلفحي طرحتك تمشي لصاحبتك في بحري
مشتاق لعربتك النهبوها
للجبل والقطينة وانت ماشي النيل الأبيض وكردفان
مشتاق للجنينة ولتفاصيل شارع ابو جبيهه وكادوقلي
مشتاق للعربات الكبيرة ال كنت بتمشي بيها نيالا (بضائع ماشه بضائع جايه والأمن ثالثكما)
انت مشتاق ود مشتاقين
….
تشوف محل طعمية يسكك الشوق يوصلك محل الطعمية ال كنت متعود تفطر منو
…
إنت مشتاق …
ومناديل العالم ما بحلنك
والله جد…
….
مشتاق تضرب لي اصحابك تلاقيهم كلهم
تلاقيهم وتبل الشوق
…
مشتاق تمشي خميس وجمعة لي اهلك في الجزيرة … تشبع ونسه وتجي راجع ملان طاقة روح
…
مشتاق تمشي الأبيض في الخريف..
للقهوة وشاي المغرب مع الجيران
…
سافرت… واشتغلت.. برسلوا ليك… بس برضو ما عارف مالك
انت عندك شوق اوفر دوز وشوية إكتئاب….
دي جرسة شوق ساي …
شايلك ( حمار الشوق) ولافي بيك
بوديك مقرن النيلين
ويوديك حتات كتيرة خلاص
شوق ١٧ برو ماكس
لدواعٍ في بالي
