هناء إبراهيم تكتب : أكلنا الشاي وشربنا العصيدة
فوق راي ..
يقول الخبر ظهور مشكلات نفسية مرتبطة بظروف الحرب في الولاية الشمالية…
كيف يعني …؟!
قصدي كيف يعني في الولاية الشمالية ؟!
وكيف يعني يكون دا خبر…؟!
القصة دي تقريباً عاملة تحديد الكل… بينما تتفاوت درجات ومسميات المشاكل النفسية….
والله جد….
أغلبهم عيانين…. لكن في ناس عاملين فيها كويسين…
فـ الموضوع لا محتاج لجنة تشخيص ولا اجتماع مطوّل….
توتر…قلق…أرق…خوف..إرهاق نفسي…
دا بقى النظام الرسمي… للأغلبية
وقاعدين علي الهبشة…
وبتكلموا براهم….
لو عملنا استبيان وكان السؤال الأول هل تشعر بالضغط النفسي بسبب ظروف الحرب؟
المواطن السوداني ولا ح يتم ليك باقي الأسئلة…
الحرب دخلت في تفاصيل الحياة …
في نوم الناس، في رزقهم، في سفرهم، في مستقبل أولادهم، في مكالمات التلفون….والدليل في الشارع والتيك توك..
و المجتمع ذاتو بقى عندو قدرة عجيبة على التعايش مع القلق.
الزول يضحك معاك، يهظر، يشرب شاي، ويتونس…
لكن جوّاه جهاز إنذار شغال 24 ساعة.
يعني من برا
الحمد لله، تمام… فل الفل
ومن جوه الله يعينو…..
شايف آثار الحرب الـ في الشوارع والمباني دي ..
في آثار زيها تماما بتظهر في الإنسان ذاته، وفي مزاجه، وفي علاقاته، وفي قدرته وملف تفاصيلو اليومية….
لذلك الصحة النفسية ما رفاهية ولا ولا حاجة بنخجل منها….
وهسه ( اكلنا) الشاي….
المبنى المكسور ممكن يتبني.
لكن النفس المكسورة محتاجة زمن، واحتواء، وأمان، وكلمة طيبة.
أول حاجة يجيبوا معالجين يعالجوا المعالجين عشان يتعافوا ويعالجونا…
وهكذا وهكذا…
و…….
ام عقولنا نصاح
لدواعٍ في بالي
