هناء ابراهيم تكتب : نص كيلو شمار
فوق راي
سيدة من كولومبيا عمرها ٦٧ عام اشترت بيتين وكونت ثروة متوسطة من خلال عملها والذي هو ( عبارة عن شنو انتوا قايلين)…
عبارة عن نميمة…
والله جد…
نعيمة جد جد… بالمعنى الحرفي…
فهي حينئذ بتبيع أخبار الحي واسراره مقابل المال…
اتفرجتوا…؟!
من جهة أخرى بتاخد قروش من أشخاص مقابل انها ما تتداول أسرارهم في بورصة الحي…
يعني بيع وكتمان …
لأعلى سعر….
كلام عجيبة …
دي ما نميمة… الشغل دا مؤسسة متكاملة وحاجة بت ستين مصيبة….
الاستثمار في الفارغة والمقدودة والفضول…
أظن عندها قسم تحري، وقسم أرشفة، وقسم حماية وشؤون قانونية وهكذا وهكذا….
ممكن عادي بعد ( تجلس) أوتتقاعد تعمل مراسلين في كل شارع، ومندوبين، ومصادر تشرب الشاي مع الناس وتأتي بالخبر ( الثمين)
وكالة أنباء جهنمية..
أعتقد ذلك….
شافت الناس مستعدة تدفع قروش في شنو ونصبت اضانا هناك…
زوجة فلان مشت وين…
فلانة اتطلقت ليه
وعلان اشترى العربية كاش ولا تقسيط
لا توجد أزمة خصوصية…
بني ادم بحب يعرف أخبار الناس أكتر من أخبارو ، ويتابع تفاصيل حياتهم بحماس يحير…
وهسه شربنا الشاي….
هي طبعاً رصيدها بزيد في البنك وبنقص هناك…
هناك إنت دا….
أقول قولي هذا وعارفه الناس الشغالة توصيل مجاني وهسه ببكوا في الزاوية….
و……..
كيلو الأخبار عامل كم ؟!
لدواعٍ في بالي
