هناء إبراهيم تكتب : عندهم ضغوطات وعندك ايسكريم في التلاجة
فوق راي
جد جد… العلاج النفسي بقى ضرورة!
لازم يكون عندك رقم وطني ودكتور نفسي…
ما بتتعالج بتعل معاك مليون تانيين!
وهكذا وهكذا…
العيان يتعالج يا جماعة…
وإننا حينئذ نطالب بمجانية العلاج النفسي، لأنو الصحة النفسية ما رفاهية، ولا دلع، ولا قلة شغلة…
ثم على صعيد اخر… دايرين الأسماء البلدية لـ(توكسك وريد فلاق ونرجسي)!
حيث قبل نستورد المصطلحات دي.. كان عندنا ليها مسميات سودانية أصيلة…
مصطلح في محلو…
مصطلح خال رتوش وتغليف….
الزول البستنزفك نفسياً وما بخليك تعرف تنوم، ما تقول ليهو توكسك… قولا بالسوداني؟!
والزول البقلل منك، ويكسّرك، ويخليك تشك في نفسك، ما تقول عليهو نرجسي…
قول ليهو الكلمة ديك…
والزول البوريك وشو التاني بعد ما تطمئن ليهو، ما تقول عليهو ريد فلاق…
خلي يعرف إنو مؤذي وعواليق…..
والله جد!
عندنا مخزون لغوي عجيب في وصف السلوك البشري..
وصف بالملي….
المشكلة لمن نعرف إنو الزول بأذينا، ونقعد نفتش ليهو عن أعذار، ونقول أصلو طفولتو كانت صعبة، اتربى بطريقة معينة، و عندو ضغوط…
ممكن نفهم ظروف الناس، لكن ما معنى كدا نديهم تصريح مفتوح يجرحونا!
وممكن نراعي مشاعر الناس، لكن مشاعرنا دي ما عندها أهل يسألوا منها ولا شنو…؟!
فرق كبير بين زول محتاج مساعدة نفسية، وزول محتاج يراجع طريقة تعاملو مع الناس.
ما كل زول عصبي مريض نفسي، وما كل زول أناني نرجسي، وما كل علاقة متعبة معناها الطرف التاني عندو اضطراب نفسي… التشخيص عند المختصين، والسلوك المؤذي بنقدر نرفضو من غير ما نوزع شهادات مرضية على خلق الله.
وبالمناسبة، ما كل زول محتاج دكتور نفسي معناها مجنون، وما كل زول بضحك معناها مرتاح، وما كل زول ساكت معناها متصالح مع نفسو…
سلامنا النفسي ما أنانية…
و……..
وهسه شربنا الشاي
لدواعٍ في بالي
