هناء ابراهيم تكتب : وكالة (قالوا) للأنباء
فوق راي..
في أي حلة يوجد نوعين من مصادر الأخبار… مصدر (ثابت) ومصدر (مؤقت).
المصدر المؤقت هو عبارة عن شخص حضر حدث معين على سبيل المصادفة وأخبر من أخبرهم…
وهسه شربنا الشاي…
إنما المصادر الثابتة انت لا تستطيع أن تعرف (الجماعة ديل بجيبوا الاخبار والشمارات دي من وين)…
والله جد…
(بنات عربي) ويعتبرن عند بعض الناس مصدر ثقة ما فيهو اي كلام…
خبر معتمد… بما إنو جابنو بنات عربي شخصياً يبقى معتمد ووالي ورئيس جمهورية…. يعني إذا ما صاح كلو فيهو جزء من الحقيقة ويستندوا على ذلك بمقولة (مافي دخان بدون نار).
هذا وقد يتم التشكيك في بعض التفاصيل.. إنما الخبر صحيح
طالما رواية وإخراج بنات عربي.
وتاني شربنا الشاي….
عندك مثلاً (عواطف) مصدر أساسي بتميز بحاجة غريبة جداً وهي إنها (ما بتتغالط كلو كلو)
افرض (سعاد عيانه مرقدة في مستشفى ودخلت في غيبوبة واعتقد أحدهم انها ماتت وكلم عواطف بالتلفون…وبعد دقيقة اكتشف إنها في غيبوبه وعايشه ورجع بذات التلفون لكن برصيد أخبار جديدة لي اختنا عواطف للأنباء.
يلا تعال اقنع عواطف إنو سعاد عايشه…
انت أمام المهمة المستحيلة …
مافي دخان بدون عواطف …
إذا سعاد نفسها خرجوها وجات الحله وعملوا الكرامة ووقفت قدامها قالت ليها عواطف إزيك انا بخير وعافية لا ينقصي شيء غير رؤياكم وتحويلاتكم البنكية … ح تقول ليها انتي ميته وشبعانه موت…
ما بتتراجع نهائي…
مرة في مناسبة وجوطه بحكي ليها في حاجة وهي ما سامعه كويس … قومي ألفحي الكلام غلط…
وحين بلغني الأمر … اتصلت بكل بساطة اصحح ليها الكلام…. قالت لي يازولة ما تغالطيني
اتفرجتوا ؟!
ما اغالطك كيف…. انا المصدر
ما بتتفاهم أبدا مهما يكون …
في ( الصعيد العائم ) اللي هم (ناس قالوا) ديل ببدوا الكلام بي ( قالوا حصل كذا كذا ….. )
وذلك ليس بهدف حماية المصدر بل ( لأنو نجر ساي)..
عندهم مرضه إسمها ( اللخبطة)
لخابيت خلاص…
والله جد …
تأليف ساي مع القليل من سجم الرماد
وإن كان عن نفسي انا شخصياً بعملوا لي تسمم مزاجي
والله جد…
ذات زهجة حددتها مع واحد فيهم (حالياً ( قالوا دي) في أغنية ( ما قالوا عليك حنين) بفطها )
والله جد
المصادر الثابتة بالطبع يتم ذكرها .. عكس ناس (قالوا) يقول ليك بنات عربي قالن وقالتو عواطف
و……….
هو البقولو الناس شويه
لدواعٍ في بالي
