هناء ابراهيم تكتب : حب من طرف جاحد
فوق رأي
يعيش البني ادم هذه الأيام علاقة توكسك …
علاقة بت ستين مشاكل….
إنتظار وسهر وزهج وقلق مع تطبيق بنكي…
يقضي الليالي حزين دايس على الأرقام..وعاضض علي الإبهام برضو..
والله جد…
تمشي السوق يا جيت ساي … يا جيت مديون شايل ارقام تلفونات وحسابات…
تلفونك كلو أرقام تجار…
عماد الفرن ٣ ألف
بدرالدين العطارة ٣٠
صلاح دكان الإجمالي
وووووو
وهكذا وهكذا ..
تساهر حينئذ في إنتظار عطفو….
دي شغلة فارغة والله…
اتكلموا معانا بي صراحة كدا قولوا لينا الحاصل شنو…؟!
مالكم؟!
قصتكم شنو…؟!
ماسكين علينا زلة…
دايرين تجننونا؟!
نطالب بشوية اهتمام… شوية سيولة عاطفية..
العلاقة دي بقت استنزاف نفسي واقتصادي من الدرجة الأولى.
والله جد…
العلاقة دي محتاجة جلسة مصارحة، كلامنا و(طنطنتنا) وصلتكم… سمعونا كلامكم…
دايرين نفهم: هل في مشكلة في النظام؟ ولا النظام ذاتو هو المشكلة؟
دخلتونا في مشاكل عجيبة….
وهسه شربنا الشاي…
تمشي لي حاجة دقيقتين تقيل في السوق…
أها يا عشاي لو دي ما علاقة توكسك، التوكسك شنو طيب ؟!
و……..
غايتو الناس تحتسب
لدواعٍ في بالي
