هناء إبراهيم تكتب : نحن البعاتي ولا كيف؟!
فوق راي..
كل يوم خبير جديد … في مجال جديد … وقصص حينئذ
قبل كم يوم ظهرت خبيرة طاقة قالت إن العالم انتهى فعلاً في 2012 النسخة الحالية من البشر ما هي النسخة الأصلية…
اتفرجتوا…؟!
يعني نحن كلنا (البعاتي)…
نحن آثار ما بعد نهاية العالم
نحن ميتين!
اها أيتها الخبيرة نحن نسخة مزيفة ولا ذكاء صناعي؟!
ثم موضوع الطاقة دا ذاتو محتاجين نفهمو…
بقوا يفسروا اي حاجة بالطاقة
لو زول ما رد عليك: طاقتو سلبية.
لو رد عليك: طاقتو متذبذبة
لو اتصل عليك: في اتصال روحي.
لو ما اتصل: الكون عندو رسالة ليك.
اي كحه اي حاجة لازم الكون يكون طرف فيها…
إذا العالم انتهى في 2012
إليك التفسير الممتاز للحاصل حولنا.
الأسعار طارت السماء…
النظام الكوني مختل… والسلع بتطلع في الروح
الناس بقت تستسهل الكذب؟
دي نسخة بشرية غير مستقرة…
ناس التيك توك
ديل بكونو النسخة التجريبية !
المهم تاني كان سألوك من فاتورة موية ولا كهرباء … قول انا ميت…
وهسه شربنا الشاي….
حتى الناس بقيتوهم نسخ وليهم تحديث جديد….؟!
غايتو غلبكم البتعملوا
وغلبنا البنقولوا
و ……..
كل الكون مسافر
لدواعٍ في بالي
