هناء ابراهيم تكتب : افتح صفحة ٢٢
فوق راي
أمس كان يوم المعلم… المعلم الذي علينا أن نكرمه ونقدره فـ نكرم ونقدر ونزدهر ونتعافى ونقوم علي حيلنا…
والله جد….
الجزء الأساسي من طعنات المجتمع قاعدة تجي من خنجر الجهل…
بننضرب من الحتة الفيها الجهل وعدم الأخلاق والـ اتنين معا…
نسأل الله السلامة واللطف…
التعليم برتب طريقة تفكيرك… وتعاملك… وبوريك طريق تختلف بيها مع الناس من غير ما تخرب الدنيا
والمعلم ما الزول البدخل الفصل ويقول ليكم افتحوا صفحة ٧٢…
دا يا عزيزي البشارك في صناعة الإنسان ذاتو…
حينئذ …
حيث اتعلمنا من المعلمين حاجات من جوه المنهج، وحاجات ما لاقين ليها كتاب..
وهسه شربنا الشاي…
وطبعاً ذكرياتك مع المعلمين بتتابعك عمرك كلو…
والله جد ..
المعلم الـ لمن تسمعو من آخر الفصل، تعرف إنو دي مرحلة الطوارئ…
والمعلم الـ عندو نظرة تخليك تراجع كل أخطاء حياتك من سنة اولى لحدي الحصة دي
الـ معلم العندو مسطرة لدواع ما….
والمعلم الهين اللين… القريب من الكل
المعلم الـ ما محتاج مسطرة ولا صوت عالي…
و معلم العقاب عندو تربوي جداً.
معلم عندو جهاز كشف كذب في عيونو…
بعاين ليك يعرفك …
معلم كان بشرح بطريقة تخليك تفهم مرتين….
و معلم عندو بصمة خاصة في الشرح…
معلم مع المادة بدرسك الحياة.
معلم شجع طالب كان شايف نفسو ما بنفع…
معلم شاف موهبة في زول ما كان شايفها في نفسو…
المعلم داير مجتمع يقدر العلم ذاته…
الأخلاق بدون علم ممكن تتوه، والعلم بدون أخلاق ممكن يعمل لينا مشكلة أكبر من الجهل ذاتو…
شكراً جميلاً…
لكل معلم مرّ علينا وترك فينا حاجة قيمة…
ياريت نعرف إنو أخطر حاجة ممكن تحصل لبلد…
إنو الجهل يبقى عندو ثقة عالية في نفسو
والله جد…
و………
احترامي ليك من صميم قلبي
لدواعٍ في بالي
