البرهان: عهدنا مع الشهداء تطهير الوطن من المتمردين والمرتزقة

أدى الفريق أول ركن عبد الفتاح البرهان عبد الرحمن رئيس مجلس السيادة الانتقالي، القائد العام للقوات المسلحة واجب العزاء في شهيد الوطن اللواء الركن معاوية حمد عبد الله، قائد الفرقة 22 مشاة بابنوسة الذي استشهد في ارض الميدان.
القائد العام أدى الواجب بمسقط رأس الشهيد انقري بالولاية الشمالية وخاطب الحاضرين بقوله: “هنالك اناس لم نستطع الوصول اليهم ولكن هنااك ظروف كتيرة وملابسات، لكن الوقفة الوقفها معاوية وأخوانو وقفة بطولية وقفة تمثل فعلاً القوات المسلحة وتمثل السودانيين والبيئة والشطر الرضع منو معاوية هنا في المنطقة دي، عشان كده نحن أصلاً ما بنندم ولا بصيبنا جزع لأنو طالما هذه الأرض أنبتت معاوية قطع شك ح تنبت آلاف وملايين معاوية سيعيدوا لهذه الأرض وسيعيدوا للسودان مجدو وسيعيدوا للقوات المسلحة عزتها، وبيهم راية السودان ح ترتفع إن شاء الله عالياً، نحن ما عندنا حاجة غير نسأل الله يتقبله ويتقبل الشهداء جميعاً، وعدنا ليهم وحق دماءهم القدموها دي، نحن كلنا نستمر في هذه المعركة إلى أن نطهر السودان من أي مرتزق وأي متمرد وأي خائن، وانتو كمواطنين وقفتوا مع القوات المسلحة سندتوها قدمتوا ليها أبناءكم قدمتوا ليها كل شيء، نتمنى هذا الاستعداد وهذا العطاء يستمر والتلاحم مع الجيش يستمر، وما بنقدر نحن نحقق مبتغانا في إنو نهزم هذا التمرد ما لم نتكاتف ونتوحد ونكون جاهزين مستعدين، قائد الفرقة وقائد المنطقة والوالي ما في حاجة بتمنع الناس إنو ما يستعدوا المعركة دي ما ح تنتهي إلا ينتهي هذا التمرد، ونحن ما بنعرف ما يخبئه الغيب عشان كده يجب إنو الناس في كل وقت يكونوا جاهزين، نحن نفتكر أن المقاومة الشعبية دي نحن دايرين نعض عليها بالنواجذ، حتى لو الحرب وقفت يكونوا الناس موجودين معروفين مسجلين سلاحهم موجود قاعد عند القوات النظامية هُم عارفين، ولو في طريقة كل ستة شهور أو تلاتة شهور إنو يعيدوا يتدربوا تاني وكل زول يتمم على سلاحه، يعلن جاهزيته ويخلي روحو جاهزة، إن شاء الله السودان سينضف من هؤلاء المتمردين، والسودان سيعود والأرض السودانية المحتلنها الجماعة ديل ستعود قريباً إن شاء الله، ربنا يديكم العافية ربنا يقويكم، إن شاء الله ربنا ما يرينا مكروه في عزيز لدينا وينتصر السودان وتنتصر القوات المسلحة” ..