هناء ابراهيم تكتب: هبوط في سوق المشاكل

فوق راي

في هذا العالم الكثير من ( الشغلانات) المحيرة ..
الشغلانات هنا جمع ( شغلة/ شغل/ عمل) وذلك حسب مذهب حبوبة جيرانا اللغوي ..
على سبيل المثال…
إنت متخيل إنو في رجل شغال ( بتاع مشاكل) ..
والله جد…
بشاكل في مشاكل ماعندو فيها أي شغلة بمقابل مادي متفق عليه …
والله جد…
يتقاضي هذا الرجل ٢٦ دولارا في الشكلة…
يخوض مشاجرات كلامية بدلاً عنك…
المحرش ما بقاتل… لكن الدافعين ليهو بقاتل …
وهسه شربنا الشاي…
سؤال حلال : إنت وقت ربنا أنعم عليك بنعمة إنك ما بتعرف تشاكل أو ما عندك وقت تشاكل…. بتدفع قروش في المشاكل ليه؟!
إنت مجنون…؟!
في وقت ما … ما كنا لنصدق وجود هذه الأشياء…. إلى أن شاهدنا الشوارع الخلفية في السياسية والحروب الإعلامية والذي منو…..
فـ وقع لينا فهم هذا الرجل الذي يخوض المعارك الكلامية بالنيابة عن حضرة سيادتك….
فـ نسأل الله السلامة واللطف …
حيث الشكلة صناعة… لها عمالة وأجور ومقاولين…
سوق شين….
يوفر الشتائم، و المعلومة المنقوصة … التلاعب في المعلومات
وزول بجيب ليك الجمهور، وزول يتولى التصفيق… وزول مهمتو يرفع ضغط الطرف التاني
إدارة تشغيل يا باشا…
ميزانية للغضب…
والإساءة بقروش….
وشكلتين بقروش والتالتة مجان…
والله جد…
تقول حبوبة جيرانا: الزول البشاكل ليك بالقروش، أول ما تقيف القروش بقيف في النص! يعني ما عندو قضية معاك ولا مع خصمك… عندو قضية مع الحساب
والمصيبة إنو في ناس بتفتكر إنو كثرة الشتائم دليل قوة، وإنو أعلى صوت هو المنتصر، و البقدر يجرح أكتر هو البقدر يقنع أكتر…
دايره اقول ليك دي ما قوة حجة… دي قوة حنجرة ساي…
ما كل معركة تستحق إنك تدخلها…
اعتقد ذلك…
من أكبر مصائب هذه الزمان بقى في ناس بتأجر عقولها وألسنتها، وناس بتستأجر عقول وألسنة الآخرين…
فـ نسأل الله السلامة واللطف… وأن لا يجعلنا من أصحاب الشغلات التي لا شغلة لنا فيها…
و………
اجرني الـ نخجل ليك
لدواعٍ في بالي