هناء ابراهيم تكتب : واقعية 600 جرام
فوق راي ..
في مقطع من أغنية تقول المغنية ( أنا واحدة واقعية) وإنك حينئذ إذا عملت دكتوراة في الواقعية ما ح تقدر تستخرج ربع جرام واقعية..
والله جد….
(أنا واحدة واقعية ما بتحب دبدوب هدية)
جميل جداً…
هل إنت من جماعة ( عايزة ورد يا ابراهيم) ؟!
لا …
قالت
( عايزة سلسل عيدية جراماتو ٦٠٠)
عايزة خاتم هدية جراماتو ٣٠٠
سلسل وخاتم
600 و300
لا لا ممتاز …
احسب يا بنك السودان المركزي…
الواقعية كما ينبغي لها أن تكون…
والله أفتكرتها لمن قالت واقعية ح تطلب ( ساندوتش طعمية أو شاورما) بدل الدبدوب ..
الواقعية ذاتا مهجومة منك…؟!
إذا كان وزير ( وزيييير) يبحث عن وظيفة أخرى لضعف الراتب
لا لا …..واقعية
إذا كان الناس دي كلها ( اتشفشفت شفشيف عدوك) وبدت من الصفر
لا لا… واقعية
إذا كان الحرب تسوي كدا …
لا لا واقعية
ونعم الواقعية
واقعية بالشطة والليمون والكاتشب…
عليك الله مدرسة الواقعية المستعارة دي فاتحة وين … دايرين لينا منها ربع كيلو عالم موازي
وهسه شربنا الشاي…
كانت الاغاني تبالغ في الشوق والوصف والجمال… بقت تبالغ في الطلبات
….
لما أغنية تقول دايرة “سلسل 600 جرام”
البجيب العربية والدهب الـ بالوقية
بكل أريحية كأنها بتطلب رطل سكر..
في وقت رطل السكر ذاتو داير حساب وميزانية…
يا سلاااام على الواقعية…
الواقعية ما إنك ترفعي سقف الطلبات…
الواقعية إنك تكوني عارفة الظروف…
اطلبوا ساي وجيبو ساي… لكن ما تغشونا تقولوا لينا دي الواقعية …
لو دي الواقعية معناها نحن عايشين في الخيال ( شوفوا لينا باصات عودة واقعية)
….
و…….
شارع المطار غدار
لدواعٍ في بالي.
