هناء إبراهيم تكتب : محايد… كيف يعني؟!

فوق رأي ..

من ناحية تفكير وخيال أقف كثيراً عند قول المساح ( مشكلة بين هواي وجفاك وإنت محايد ) في بتو الجميلة ( غصن الرياض)..

التابعة للهيئة القومية للكوارث العاطفية ..

المساح كتب الأغنية بطريقة ( تخطفك وتقبض عليك)…

أنا بتأمل شكل الشكلة دي…

مشكلة بين هواي وجفاك… وإنت محايد.

كيف يعني محايد؟!

ياخ الحياد دا في الحب شين …

والله جد …

طرف واقع في الحب يكتب القصائد، ويحفظ الود ويتذكر كل التفاصيل ..

وطرف عامل فيها الأمم المتحدة!

لا مع الهوى… ولا ضد الجفا… واقف في النص… يراقب الأزمة الإنسانية والقلب الذي يعاني الظروف والشدائد …

إذا خلاص اتقطع ح يقول اشجب وأدين واستنكر..

استنكر إنت دا…

المشكلة ما بين زول وزول….

المشكلة بين شعور قاتل، وبرود جراح بريطاني…

حينئذ….

الهوى يقدم شكوى… والجفا يقدم أدلة… والمتهم الحقيقي واقف محايد….

كدا بس…

وهسه شربنا الشاي..

والحياد في العلاقات أخطر من الرفض…

على الأقل الرفض بريح القلب .. بتتعافى منو……. أما الحياد، بخلي الزول معلق بين السماء والأرض… لا قادر يمشي… ولا قادر يقيف…

والمحايد زول عجيب…

لو اتصلت بيهو…يعمل مشغول

لو ما اتصلت… يقول ليك مالك مختفي؟!

يعني فاتح كل الأبواب… لكن ما مديك مفتاح أي باب.

والأغرب من كدا… إنو المحايد غالباً بكون مرتاح جداً.

إنت بتعاني من ارتفاع ضغط الحب… وهو يعاني انخفاض شحن البطارية!

بطارية اخلاقو مرات….

إنت بتفسر الرسائل بالنحو والصرف والبلاغة… وهو يرد ليك بي (تمام) مثلاً…

الحياد أحياناً زي خدمة للعملاء.

كل ما تسألوا من موقفو….

يقول ليك: تم استلام طلبك… وسيتم الرد عليك في أقرب فرصة…

وأقرب فرصة دي بتجي بعد القلب يقدم استقالتو!

بعض الناس لا يكسرون القلوب… هم فقط يضعونها في وضع الانتظار… ثم يعيشون حياتهم بكل حياد… وكأنهم لم يسمعوا صوت الرنين من الأساس…

الغريبة بعد دا كلو مدحو مديح يحير حيث بنى لها قصور من الشعر والمحبة والذي منو….

و…..

حن يا حبيب كفاي مُر العذاب وشدايد

لدواعٍ في بالي