هناء ابراهيم تكتب : ما تجيب ليها الكلام
فوق راي ..
السنة دي عيد الأم لقى نفسو في جناح عيد الفطر…
لقى ليك الناس مشغولة بـ صناعة الخبيز وتغيير الستائر وملابس العيد وإجراءات النظافة العليا…. وبالتالي لاحظنا بوستات أقل … هدايا أقل
وهسه شربنا الشاي…
أجمل هديا تقدمها لـ والدتك ما ورود ولا عطور…
لا موبايل فاطمة كباشي… لا خاتم توتا عذاب لا تياب هدى عربي ونضال حسن الحاج…
أجمل هدية… إنك لمن تتعامل مع الناس في أي مجتمع .. الناس تدعي ليها ما تدعي عليها…
والله جد….
يعنى تمثلها في أي مجتمع خير تمثيل …
تخلينا نقيف على حيل التقدير ونقول : يا سلاااام على التربية وعلى الربوك…
يعني حياة كاملة من الإحترام والتهذيب… مع بعض الأخطاء العادية….
وهكذا….
أعظم هدية إنك ما تخليها تقول ( ياربي انا غلطت وين عشان ولدي يطلع كدا)…
…
يعني ما تجيب ليها الضغط ياخ…
وما تجيب ليها الكلام ..
يعني ما تخليها تلفح توبا تخلي ليك البيت والكوكب . ..
خليها تقول ( الحمد لله تربيتي ما ضاعت ساي وتنوم بالا مرتاح)…
الناس ما بتشوفك إنت بس… بتشوف تربية أهلك….
طبعاً الهدايا ما بتضر … لكن عدم التربية بضر…
الهدايا حلوة … لكن التربية أحلى
أهديها سلوك جيد…وأخلاق عالية… وسمعة طيبة… وخلي الهدايا التانية تجي كـ bonus
و………
يا أحلى نشيد يا نغمة جميلة
لدواعٍ في بالي
