هناء ابراهيم تكتب : شغالين طلبة مع عبدالرحمن الريح
فوق راي ..
كنت مع صاحبتي بنخبز لينا في فكرة كدا… فـ سألتني حبوبة جيرانا إنتوا شغالين شنو؟!
قلت ليها نحن شغالين طلبة مع عبدالرحمن الريح …كل صباح نبني في الآمال.. لحدي ما نجد الرباح إن شاء الله …
وهسه شربنا الشاي….
منتظرين ذلك الصباح …
الذي يخجل البدر ويخمد المصباح
الأغنية دي نشيد التعافي النفسي لمزاج حبوبة جيرانا ومية مليون آخرون…
والله جد…
القلوب ترتاح للكمال التام
في الجمال نرتاح
صدقا لي كلامك إنك مرتاحين في بيوت اغنيتك دي….
إستراحة ٧ نجوم
الجمال شراح للصدور لكن للقلوب جراح
خلي معمل ومركز غير دكتور عبدالرحمن الريح يعمل ليك تشخيص ورسم قلب بالدقة دي …
لا تعرفو طبيب جراح لا تعرفو دكتور نفسي ..
تشخيص مجاني للحالة العاطفية يخلي ناس علم النفس وناس التنمية البشرية والاستشارات والكورسات المدفوعة يقفلوا عياداتهم ويشوفوا ليهم شغلة تانية….
قالوا اهل الحب في الزمان الراح
نشوة الأشواق احلى من الراح
خبرة وحب…
لخصو مسلسل الحب كلو في نص حلقة….
سرنا المكتوم بالدموع انباح
الحمد لله يا دكتور ما حضرتا زمن السوشيال ميديا دا …. كان انباح من جهة أخرى
وهكذا وهكذا…..
تعال اقيف شويه واسمع القصة دي .. قال ليك :
عينو في الورد وروحو في التفاح
اتفرجتوا….
كتاب النفس البشرية الامارة بالجمال
زمان وانت رايق ( هات لينا صباح) دي إذا خلاص خيالك اتجدع بتسمعا كـ حكاية عاشق سهران … ولهان هايم… بين سهاد ودموع وتفكير … هسه بما إنك ( إبن حرب) لازم تسمعا كـ دعاء جماعي لشعب ..
فهي بترجمة الواقع وطن يتمنى أهله صباحاً لا يخجل البدر ولا ينطفئ فيه مصباح… ولا يهاجر فيه الناس بحثاً عن كرامة أو أمان..
الليل طال كثيراً لكننا رغم كل شيء نردد بأمل ويقين .. قائلين
يا ليل… يا ليل … هات لينا صباح
و……….
اصلو زول لكن صورو الفتاح
لدواعٍ في بالي
