هناء ابراهيم تكتب : القمرية و«ود ابرق» برضو
فوق راي ..
في قائمة المخزون الفني عندنا اغاني بت ستين جمال وبساطة…
بتسوقك من خيالك بتوديك لقلبك..
أغنيات لمن تسمعا بتحس إنو الحب بغيّر للبني ادم المنظومة الغذائية والعاطفية والبيئية كلها!
والله جد…
فجأة يقوم يحب الزهور… والحمام… والقمرية… والدوح… والشاي وشنو وشنو….
…
قالت منى الخير:
عشان هواك حبيت قمريّة فوق الدوح
تغنى للعشاق الحب بدال النوح
الحكاية ما إنها حبتك إنت بس ..
لا لا الموضوع طويل حينئذ…
حبت القمرية البتغني ديك !
قمرية بتأدي في وظيفتها الطبيعية، لقت روحها فجأة شاهدة على قصة حب!.
لقت روحها جوه الحب…
لقت روحها فنان العشاق في حي ناس منى الخير….
ثم قالت :
عشان هواك انت يا دنيا من ألحان
صنت الهوى صنت طردتها الأحزان
حيث الحب هنا ما كان الحاجة البتخليك مساهر للساعة تلاتة صباحاً تراجع في الواتساب….
كان حصانة ضد الأحزان.
وزعوا لينا حب من الإصدار دا ياخ…
ما تقوم وزارة الصحة تضيفه لقائمة علاج الأمراض المزمنة!
وهسه شربنا الشاي…
في ثغرك البسّام عرفت أفراحي
علمتني ما الحب يا سعدي يا راحي
ابتسامة واحدة خلتها تعرف أفراحها وين…
ابتسامة برتبة تأشيرة وموافقة امنية…
ثم نصل لمطار :
يا واهب الآمال بدلت أتراحي
عشان هواك إنت شديت بأفراحي
حب عندو قدرة تحويل الأحزان إلى أفراح…
وهو حينئذ سبب غناها ذاتو….
عشان هواك انت حبيت زهور وحمام
حملتها الأشواق ومن قلبي ليك سلام
الزهور والحمام سفراء دبلوماسيين بين القلوب.
والسلام عندو جناحين!
حمامة تشيل الأشواق، وزهرة تحمل المعاني…
حب خلاها تشوف الدنيا أجمل.
القمرية أحلى.
الزهور زهور برو ماكس
الحمام وجيه وأجمل ..
والأيام ملونه
حب
يخليك تحب الحياة كلها …
عشان هواك إنت بقيت دوام بسّام
ما عادت تبتسم بالمناسبات…
الحب عمل ليها تحديث دائم للوجه!
فلتر داخلي مبتسم
وهكذا وهكذا…
و……
في الروض تغني دوام
لدواعٍ في بالي
