هناء ابراهيم تكتب: هاشتاق اخر الإسبوع
فوق راي
#####
من الصباح عاملة ١٤ إشتباك…. جيت المساء لقيتهم بغنوا لي ( الرايقة) قلت ليها الرايقة دي لعلها أنا؟! كضب السواد…
تلقى الواحد بشرب في اليوم ٣ باكو سجائر والفنانة تقول ليك ( ما شراب سيجار)….
شراب أكتر من كدا كيف….؟!
######
ارسلت أمل رسالة في قروب الواتساب تسأل عن (دفار)
سألتها ريان بكل جدية وشي من الفضول : دايره تنقلي شنو؟!
قالت ليها : الطاقة السلبية
الطاقة السلبية بقوا ينقلوها بالدفار ولا دي مساخة ساي؟!
إذا الكلام دا صاح ناس الدفارات ح ينافسون إيلون ماسك
حينئذ……
#####
داير إجابات نجيضة اشتريها من سوق المواقف… الإجابات الفي سوق الكلام دي كلها مضروبة…
والله جد
########
من أغرب أخبار هذا الاسبوع
طفل اسمه نيفادا من ولاية فلوريدا، عمره ٣ سنة مهارات فل في كرة القدم ومافي شافع قادر ياخد الكورة من رجله …
قام أولياء الامور الأفاضل الاكارم طالبوا إنه يطلع من الدوري لأنهم دافعين اشتراك عشان أولادهم يلعبوا فـ كيف ما يمسكوا الكورة ( ويشموها قدحة)….. صعّدوها أكتر حيث طالبوا الشرطة بالتدخل .. واتدخلت فعلاً بتهمة إنو شافع ماهر وقام أهله بأخذه
اتفرجتوا….؟!
#######
الأيام دي حاول ما تسأل زول في السودان وإنت برا السودان ترجع أو لا؟!
لأنو يا قافله معاه من الكهرباء
يا قافلة معاه من أزمة الوقود
يا من الغلاء
فإذا بحبك بقول ليك ما تجي يا زول
وإذا ما بحبك بقول ليك (تعال بالعندك… الجنيه بسندك )
فـ ما تسأل الأيام دي…
######
قال :
سافرت نحوك… كي أراك وأسمعك
مضناك… ودع قلبه… مذ ودعك!!!
دنياي… ما دنياي…؟! أي حلاوة لكؤوسها… إن لم أكن فيها معك؟!
سافرت نحوك أستعيدك… لا تسل،
للحب بوصلة… تحدد موقعك!
في شرفة الأشواق أجلس… كلما
جن الظلام… أبيت أرقب مطلعك!
متى تعود…؟! نحول جسمي شاهد،
وبعض الشهود إذا تكلم روعك!!!
و………
ما اروعك
لدواعٍ في بالي
