هناء ابراهيم تكتب : وحدة العناية الاقتصادية
فوق راي..
قلت ليكم البلد محتاجة وزارة بنى نفسية، ما اشتغلتوا بي…
أها الجنيه ذاتو جَنّ، والمجانين زادوا…
والله المستعان….
البني آدم يدخل السوق يتشاكل مع الحياة، ويتأزم نفسياً، ويجي مهزوم خمسة صفر…
وهسه شربنا الشاي….
لذلك اي زول عندو مشاكل في القلب، ناس الضغط والسكر والأمراض المزمنة… الأيام دي ما يمشوا السوق…
أبعدوهم من نشرة الأسعار…
والناس تلتزم بنشرة الإرشادات الطبية والتي تقول:
يرجى الجلوس… لا تقرأ الأسعار وإنت واقف..
في حال شعرت بدوخة، اتصل بأقرب زول عندو قروش.. يسعفك كان يقدر….
و الـ ما متأثر بالأسعار محتاج لجنة تحقيق!
دي أسعار لا بتفرق بين غني لا فقير…
حيث المرتب البنزل الحساب الصباح، المغرب بعمل خروج نهائي من الخدمة….
الوضع محتاج وزارة بنى نفسية، ووزارة ترميم أعصاب، ووزارة شؤون المواطن
ووزارة للمواساة في المرتب بعد وفاته المفاجئة…
و(وحدة عناية) تستقبل المواطنين الخارجين من السوق في حالة انهيار!
محلول وريدي…مستخلص من ( بل حزمة قروش)
كمادات باردة… القماش المستخدم عليه رسومات تطبيق بنك ما بعلق…
وشخص متخصص يقول ليك:
خليك هادي… بتترتب إن شاء الله
لأنو خليك (خليك هادي) ذاتا بقت مستفزة
هادي كيف يعني…؟!
نحن ما بنتكلم عن رفاهية….
عايزين الحاجة الأساسية تكون أساسية…
مواطن يقدر يشتري أكلو بدون ما يعمل دراسة جدوى…
عايزين نفتح نشرة الأسعار وما نحتاج بعدها نشرة وفيات!
و الحمد لله دائماً…
الحمد لله إننا بنقول الحمد لله في اللحظة البتكون فيها الجيوب عاملة صيام إجباري…
الحمد لله دي حاجة ما قدر الاقتصاد ياخدها مننا…
والحمد لله دائماً…
و…….
الموه… علموه الإنفعال
لدواعٍ في بالي
