هناء ابراهيم تكتب: حسب نحن أهل منو….؟!
فوق راي
من أغرب الاستشارات الإسفيرية وأكثرها أن تجد شقيقة الزوج متحدثة بصيغة الجمع تشكي وتحكي بكل غبن عن شقيقها وزوجته وكأنهم فعلوا كوارث بينما خلاصة ما تشكو منه يكمن في (تفاهم ومحبة ومودة واحترام وتقدير ) …
الناس بتشكي من العادي …
وبعدين ماعندهم حاجة إسمها حب ( والفضل بينكم) …فهي حينئذ ساحراه وكتباه وغيرتو…
اتفرجتوا…؟!
تقول إحداهن بعد الكثير من الشكاوي انهم الآن قاطعوا اخوهم والسبب عمل توكيل لزوجته حيث نزلت السودان اشترت له أراضي وسجلتها بي إسمه… بينما الصاح كان يعمل توكيل لي اخوانو….
الصاح بمذهب (الإمام هي)….
حقيقة ناس بتحب التطبيع مع المشاكل بشكل عجيب…
اما التناقض في حال البنت بنتهم .. فهو حينئذ زوج محترم يقدر ابنتهم وبحبها وبثق فيها وجيد لي يا يمه جيد لي…..
الراي في الموقف يحدد حسب الزوجة بنتا ولا الزوج ولدنا
وهسه شربنا الشاي….
يحب بعض البشر أن يتركوا حياتهم ويعيشوا في حياة الناس ويا حبذا لو خربوها…
والله جد
المحبة لا قطعة أرض، ولا ورثة عشان كل واحد يحسب نصيبو منها كم…
أخوك لو اتصل خمس مرات في اليوم، تقولوا أخونا الحنين، وأخونا البار، وأخونا السند… لو اتصل بزوجتو مرتين دي عاملة ليهو عمل ومسيطرة وشنو ما بعرف….
ياجماعة دي زوجتة شريكة حياتو… ديل ناس حياتهم مرتبطة بي بعض….
والمضحك المبكي إنك لو قلبت الأدوار، ولقيت بنت الأسرة زوجها عمل ليها توكيل، واشترى ليها أرض، وسجلها باسمها، نفس الناس البقولوا أخونا مسحور، ح يصفقوا ويقولوا
(ما شاء الله، راجل عارف قيمة مرتو، وبيأمن ليها، و ود اصول!)
نفس التصرف، لكن التقييم اتغير!
مرة ثقة، ومرة سحر!
مرة حب، ومرة عمل!
مرة راجل محترم، ومرة راجل مغلوب على أمره!
ياخي دخلتوا المعايير غرفة عمليات….شكيتكم علي الله
أي اهتمام بالزوجة يُفسَّر بأنه إهمال للأهل، وأي خصوصية للبيت تُفسَّر بأنها مؤامرة، وأي قرار يتخذه الزوجان مع بعض يُعتبر اعتداءً على صلاحيات مجلس العائلة
المهم الداير مشاكل بلقاها….
و……….
بعدين معاك
لدواعٍ في بالي
