فوق راي .. هناء ابراهيم (رجيم إلكتروني)
إنت كـ بني ادم مسؤول من نفسك وصحتك… ضروري تاخد إجازة إختيارية من بيوت الإنترنت…
والله جد…
هدنة إسفيرية…
حيث قالت دراسات إن الأشخاص الذين يقضون وقتاً طويلاً على الإنترنت أكثر كآبة ووحدة ونفسيات من الناس التانيين..
ف شنو؟! أعمل دايت
والله أحسن ليك..
( دايت) يسمح لك ب(3) لايك خلال ساعة واحدة فقط في اليوم، على أن يكون الموضوع فعلاً يستحق الإعجاب.
السعرات التفاعلية التي يحتوي عليها هذا الإجراء تعمل على تخفيض معدل (لايك أخبار الحوادث والمآسي والكوارث والحروب ).
وحتى تكون الوجبة متكاملة ودرءاً للمضاعفات لن تحرم في هذا الرجيم من ال(شير).. حيث يسمح لك (بتاقين) على أن لا يكون أحدهما لخبر أو صورة أو تعليق متعلق بالمليشيا…
ولاحتوائه على نسبة عالية من الوقت والأخذ والرد، لا يسمح لك إلا ب(كومنت) واحد فقط لا غير..
في نهاية الساعة كافئ نفسك بي (شير) لحاجة حبيتها.
ركز في (الأمليات والتفاؤليات) من الأمل والتفاؤل ولن أقول (الفروحيات) حتى لا تنتحر اللغة العربية بصبغة هندية..
للمعلومات الأغذية الإلكترونية لا تسبب تخمة وسمنة وحسب ، فهي في الغالب تسبب (أنيميا) فقر مشاعر .
كلما أكلت منها، كلما حسنت علاقتك مع مرض الأنيميا وأحدثت ثقباً في صفائح الدم البيضاء..
لما يجوكم ضيوف في البيت وتقوم منهم عشان عندك ضيوف في (الدردشة).. دا فقر دم ولا ما فقر دم؟!
لما الكتب تقول ليك (مشتاقين) والامتحانات تقول ليك (عوووك أنا جيت) وشغلك يقول ليك (وين ياخ) وانت لافي من مطعم إكس لحلويات انستجرام، دا فقر حس والاّ ما فقر حس..
في الحقيقة هو ما فقر دم، هو عدم دم
الرجيم الرجيم يا قوم..
أقول قولي هذا من باب النصيحة
ودايرة أسألك سؤال واقف لي هنا: لما يكون عندك سمنة وفقر دم في آن واحد، نقبل بيك وين؟
برقدوك في ياتو قسم من المستشفى؟!
نعرضك علي أي اخصائي؟!
جادة معاك أنا
علي صعيد متصل لما قلبك يمشي لزول والزول دا قلبو (اوف لاين ) حضرتك موهل وجدانيا إنك تعترف لي في أي لحظة بحركة سريان قلبك نحوه طالما إنك موجود (اون لاين) فضروري تعمل رجيم قاسي.
لما تكون اون لاين بتشارك في كمية من أحاديث الغيبة والنميمة وأعتقد سجلك ما ناقص ذنوب..
والله جد..
الرجيم يا وسيم..
أنت متصل بتلاقي ناس يعكروا ليك مزاجك الأصلا عكران وأنا والله العظيم ما بعمل ليك عصير ليمون يروق أعصابك ولا عندي ليك حاجة.
و………
قالوا قطعة سكر
لدواعٍ في بالي
