هناء إبراهيم تكتب : دا التصعيد البنعرفو
فوق راي ..
في زحمة الغُنا الكتير… في أغنيات بتوقفك ( تقطع إيصال وإنت مبسوط وبتغني وقلبك معاك)..
على سبيل الجمال ( إنت حكمة ولا ايه ولا إنسان)
محمد علي الأمي تحسو نسج حالة..
“انت حكمة… انت آية… ولا إنسان؟”
السؤال هنا ما استفهام …دا ارتباك عاشق واقف قدام جمال فاق حدود الجمال وخلاهو ساهي ولهان… وسهران
اعتقد ذلك…
لما الإنسان يبقى أكبر من كونه إنسان، يتحول لمعنى… لحكمة… لآية.
شوف لعبة التكرار …
إنت… إنت… إنت…
دوري أبطال الحقيبة…
كأنو بحاول يمسك معنى هارب، كل مرة يقرب، يلقى المعنى أكبر، فيعيد المحاولة بإسم جديد، بوصف جديد… بـ إبداع جديد
ودا ما مدح… ولا هم يمدحون
دا تصعيد….
“إنت صاحي ولا نايم ولا طرفك من طبعو نعسان؟
الحيرة في إحساس الشاعر نفسو…
مش في ناس في (الفيسبوك) بكتبو في الحالة الاجتماعية الأمر معقد ولا شنو كدا ما بعرف…. هنا الأمي كتب الحالة غامضة…
“نادي… هادي… ميسان… ظافر… أسود وفرسان…”
دي ما كلمات متفرقة… دي محاولة لبناء كيان كامل من جمال، قوة، هدوء، هيبة… كل الصفات مجتمعة في هذا الـشادن الـ لادن الـ الفتان
لكن الذروة الحقيقية… ما في المدح بعد الجمال دا كلو …
بعد دا كلو القصة ما هنا …
الذروة في الألم..
“طال عذابي وصاح غرابي جوى عكران”
اختار الغراب
ما أي طير… الغراب تحديداً.
الغراب في الوجدان رمز للشؤم، للوحدة، للصوت البكسر السكون.
لما يقول “صاح غرابي”… كأنو الألم جواه بقى صوت مسموع، بقى كائن حي، ببكي وبنوح وبصيح
وجوى عكران…
اتفرجتوا….
هو طبعاً ما شغال بالطقس والنشرة الجوية حقتنا العادية دي…ديل جوهم بخطوط إبتسامتها سحب ريدا… درجة حرارة قلبها وتضاريس زعلا…
العكَر حزن مع تشويش، مع ضباب، مع فقدان صفاء داخلي ..
يعني الألم ما واضح … مربك…مشاغب
محتاجين نعمل أشعة ورنين نشوف خبرو شنو…
الأغنية بتتحول من حالة إعجاب… إلى حالة استسلام…
ومن استسلام… إلى احتراق عديل
“دمعي هامي وشوقي نامي وفرشي نيران”
الشوق “نامي”… لكن الفرش “نيران
الجسد مرهق… لكن القلب صاحي يحترق…
والبلومني في هواك يا سيدي غلطان”
هتا ما بدافع عن حبّه…
بدافع عن حقّه في الحب… وبقول ( لا للتدخلات الأجنبية) …
لكن وين … هسه شربنا الشاي
الأغنية دي جمالها ما في الكلمات بس…
جمالها في الصدق البينقط من بين السطور.. في السكة المشي بيها اللحن في إنها مصنفه في القلوب كـ ( جمال فني ثابت )
في قدرتها تحوّل الحبيب لفكرة… والحب لحالة وجودية
محمد علي الأمي ما كتب أغنية حب…
كتب سيرة عاشق
عن لمن تتورط في جمال أكبر منك
وتحاول تنجو بالكلام…
فتغرق أكتر… نجي نسمع كلامك نغرق معاك..
و………..
الصبابة مر عذابا وقلبي أقران
لدواعٍ في بالي
