هناء إبراهيم تكتب : للـليلة ردك ما وصل… والشمار كتلنا
فوق راي..
في أغاني بتتسمع…
وأغاني بتجيب كباية شاي وبتجي تقعد معاك واخر ونسة ..
جد جد….
زعلانة ولا شنو الحصل؟ بصوت كمال ترباس حيث يدور محور سؤالها عن حبيب اتأخر في الرد ولا ينقصنا سواء معرفة السبب الحلال ..
أغنية عن قلق الإنسان تجاه الصمت…
الصمت البخلّي الزول يفتش ألف عذر للناس البحبهم قبل ما يقتنع إنهم نسوه وقطعوا الجوابات….
الخوف من إنو المسافات تكبر…
وإنو الخطابات تمشي وما ترجع…
وإنو الشوق صلاحيتو تنتهي ويبقى شوق بارد… بايت
وهسه شربنا الشاي….
عبقرية النص إنو ما دخل في عتاب مباشر، ولا اتهامات،
بالعكس…
ظل يلتمس الأعذار بطريقة موجعة جدًا.
مرة يقول يمكن الظروف…
يمكن الهيئة القومية للبريد شفشفوها العوازل العزال….
ومرة يحمل الذنب لساعي البريد المسكين… الذي ربما
شم العبير… عجبو الكلام نايم عمل
خيال زي الخيال ..
دا إسمو التفسير بمعجم الطيبة….
معجم ( الغنماية الأكلت عشاك)
الرسائل دي زمان ما كان ورقة ساي…
كانت…
أجمل هدية من البلد
قولة سلام من الأهل
جملة شايلة في قلبها حنين المغتربين كلهم..
المنتظرين قولة سلام….
سلام بس.
تنزل تهب مثل الدعاش
زي كان جفاف والغيث نزل
اتفرجتوا ؟!
دي حقيقة أي زول عاش الغربة بعرفها زي جوع قلبو…
أحيانًا رسالة قصيرة بترد الروح أكتر من أي شيء تاني.
أغاني عميقة بدون تعقيد…
ما تخاف : نحن كلمنا ساعي البريد يعفي ليك ظنك …
قلنا ليهو الزول دا على متن حزن
والاسئلة في راسو حاملة حفلة بي سرور ونانسي عجرم
فـ خلي ياخ
و…….
شكراً وبعدو بهدي سلامي
لدواعٍ في بالي
