هناء إبراهيم تكتب : مولانا الكهربائي
فوق راي..
حدثتنا الأحبار أنه تم الحكم في قضية فني الكهرباء الذي انتحل شخصية قاضٍ….
جابك التيار بالتوصيل المباشر…
ولا بقيت قاضي كيف يعني…؟!
استلمت من منو..؟!
والله دا كلام عجيب….
فوضى برو ماكس….
لا… وقررت تبقى قاضٍ لشنو؟!
هل زهجت من فصل الكهرباء… قلت تفصل في القضايا؟!
جيت بي إلتماس كهربائي ولا بالعودة الطوعية؟!
عندي أسئلة كتيرة… لذلك لازمني حوار مع الزول دا….
لازم أعرف مخو قال ليهو شنو…
والله جد…
قاضٍ؟! دي وظيفة الناس البتهرب منها من كترة المسؤولية..
شكل خارب وش مع نفسك ذاتا ..
فـ دا إنتحال شخصية وظيفة فيها إجراءات وأوراق وأختام ومحاكم ومحامين وناس حافظين القانون مادة مادة….
حفظت مواد القانون ؟!
مابعرف….
لكن الثقة بالنفس عندك شغالة بنظام اشتراك مفتوح…
باقات غير محدودة…
والله جد
الحمد لله إنو الموضوع انتهى بحكم قضائي… لكن السؤال الحلال قائم:
الزول ده أول يوم دخل المحكمة… منو القال ليهو: اتفضل يا مولانا..
وهل نده بكل هدوء على أول قضية
والأهم من دا كلو….
إذا حدثت مشكلة في الكهرباء أثناء الجلسة… حيرجع تلقائياً لمهنته كـ فني كهرباء… ولا بواصل الجلسة على ضوء الموبايلات؟!
ويعمل ميت؟!
غايتو قدر ما تقول تستوعب منهج البلد دي … تلقى فنيات جديدة
كل يوم كتاب عجيب….
و……..
جنيتو والله
لدواعٍ في بالي
