هناء ابراهيم تكتب : هاشتاق اخر الأسبوع 

فوق راي ..

#في مناطق في السودان الوصول ليها في الخريف أصعب من التماسيح الحايمة دي …

والله جد …

مع إنها قريبة

#الخريف في السودان جميل … رغم ( الذباب والباعوض والكهرباء قطعت ودخلوا المراتب وامشي كان تقدر )

جميل عديل …. ودواء نفسيات

أعتقد ذلك….

#في شخص لمن يلمحك بتشرب شاي الإطلاع مع رواية أو فلم، بتبرع من نفسو ويحكي ليك القصة من أول حدث إلى آخر الأحداث ومع ذلك بختم حديثه بـ(خلاص ما أخربها ليك )

تخربا اكتر من كدا كيف ؟!

#####

حبوبة جيرانا لمن تستمع لقانوني وهو يقول وفقاً للمادة كذا من قانون كذا التي تشير إلى كذا، بتنتظره يخلص عشان يترجم كلامو فيما يعرف بترجمة العربي إلى عربي.

#####

في ناس سمحين ما لم يتكلموا، فإن حضر كلامهم بطلت سماحهم.

والله جد..

####

أكتشف أن نظرتها تحتوي على (80) عنصراً غذائياً، تجنباً للتهلكة عمل دايت

نظرة قد تسبب تخمة عاطفية..

فـ متى كان هواك خالٍ من الكلسترول؟!

######

الإنتقام يؤذي جميع الأطراف

والله جد….

####

المعني الحقيقي لتحويل الرواية إلى فيلم، هو أن المخرج يشيل أثاث خيالك من الشقة ويفرشها بديكورات خياله هو.

وهسه شربنا الشاي

و…….

وين يا غالي إنت

لدواعٍ في بالي