هناء ابراهيم تكتب : الـ نتم ليكم الناقصة
فوق راي..
أولاً كويس إنو الناس (مصدومة) في البنت ( البتتحسبن) على المراقبين الـ ما ( فكوا ليهم حبل الغش )..
وقد تكون الصدمة من التصريح العلني ..
والحمد لله كثيراً إنو في إستنكار كبير….
الكارثة إنو الحاجة دي عند البعض تقع تحت بند ( العادي) لدرجة تأسست في الأفكار حتى ظننت هذه الطالبة أنها حق وإستحقاق…
وانتوا مصدومين كدا… خلوني أتم ليكم الصدمة…
خليني أقول ليك في طلاب بموافقة وتشجيع ودعم ( أسرهم) اللي هم ( أهل وأصحاب تربيتهم) بغتربوا أيام الإمتحانات ويشدوا الرحال إلى مناطق مشهورة ومعروفه بتقديم خدمة الفساد التعليمي والغش ( بموافقة الأهل والمعلمين / ثنائي التربية)
غش برعاية أسرية كاملة …
ومعظمكم عارفين المناطق دي …. ( سمعتوا بيها وفاتت اضانكم لغادي)
والله جد ..
هل عندكم فكرة إنو في معلمين تابعين لهذه المهنة العظيمة ولـ وزارة (التربية) والتعليم … بجبروا الطالب الشاطر حتى في الفصول الصغيرة إنو يشارك اجاباتو مع ناس معينين …
هل عندكم فكرة إنو في غش بتم برضى الأسر ( المربية) والطالب بياخد قروش طباعة ( البخرات) منهم عادي…
وتجي بعدين تقول الفساد الفي المؤسسات والمسؤولين دا جاي من وين ؟!
جاي بي باصات التربية ذاتا …
باصات الغش… تقل طلاب الشهادة
لمن يجيك الغش من باب التعليم والنور
الناس تواجهه نفسها يا جماعة
والحقوا الجاي ..
فساد متربي ومقنن…. بشهادة
هسه وقت بقى علني … ألحقونا
الحقوناااااااا….. أحسموا القصة دي
قبل نلقى ناس عاملين مظاهرات لفك لجام المراقبة
ولجنة الغش المركزية
التعليم دا الحتة الآمنة لكل جيل….ابعدوا منو اي حاجة ما بتشبهوا
ما تأذونا في التعليم…
التعليم دا خط دفاع عن المجتمع كله…
إذا انهار…
ما في شهادة… ولا وظيفة… ولا دولة…
بتقدر توقف الانهيار…
بنربي مسؤولين فاسدين … من الصف الأول
ما تأذونا في التعليم…
البلد دي عشان تطيب
حتتبني بالعلم.. والأخلاق والقوانين
ولو ضاعت…
حتضيع بالغش والفساد…
هل يعقل تسمح لـ ولدك ينجح بدون أخلاق
و……..
إنّما الأمم الأخلاق مابقيَتْ
فَإِنْ هُمُ ذهبَتْ أخلاقهمْ ذهبوا.
لدواعٍ في بالي
