هناء ابراهيم تكتب : جدك إسمو منو…؟! 

فوق راي ..

في واحدة من بيوتات الفيسبوك الإستشارية كتب أحدهم مشكلته التي وصفها بالكبيرة وعاملة ليهو هاجس..

المشكلة حينئذ أنه يحب فتاة وكان ينوي الإرتباط بها لكنه أكتشف أن اسم جدها ( محرج شويتين) وأن أهله إستحالة يوافقوا على زواجه من فتاة جدها بهذا الإسم..

تباينت الآراء بين الساخر والطريف والقاسي والعنيف لكن أغلبهم أكدوا أن هذه طريقة جديدة (للفلسعة) من الزواج تحت بند ما يمكن تسميته الإسم الفاحش..

سألوه فيما يحتاج اسم جدها؟! وأن هذا الاسم يستخدم فقط لحظة العقد والناس ح تاخد ضحكتها وتنسى الموضوع..

وهسه شربنا الشاي….

هذه تقريباً آخر صيحات وتقليعات فك الإرتباط..

أهم حاجة الأخلاق واسم الجد ولون القميص..

وهكذا….

الأخ المكسوف المحرج أعلاه ذكرني موقفاً مشهوداً للسيدة الفاضلة حبوبة جيرانا ذات عملية عيون.. فـبعد أن تم تحضيرها للعميلة وكانت سيادتها قد استعدت نفسياً لهذه اللحظة.. جاء الدكتور وأخبرهم أن هناك مشكلة في اسم (البيشن) حيث إن اسم جدها مختلف عن ما هو في الفايل..

عصبت حبوبة جيرانا وزهجت وقالت له بكل ما أوتيت من حسم وجدية : أقول ليك حاجة… عملتك دي ذاتي ما دايراها أديني قروشي جاي..

اتفرجتوا؟!

قال لها الطبيب مبتسماً: اسم جدك الفي الفايل دا يتعدل وأنا أعمل ليك العملية من عيوني ديل..

لتقول له: إنت اسم جدي داير بيهو شنو كان سألتك؟! إسم جدي مالو ومال عيوني؟

داير بيهو شنو إسم جدي؟ داير ترث معاي طين؟!

اتفرجتوا تاني؟!

طبعآ إستحاله يقدر يقنعا…

حبوبة جيرانا وأنا بعرفا…

أقول قولي هذا من منطلق دور الجد في أوراق البني آدم..

وإن كان عن نفسي أنا شخصياً: جدي في الهوى جدك

و……

شيل عيونك عني

لدواعٍ في بالي