هناء إبراهيم تكتب : مقاتل بالإعارة
فوق راي..
إذا تأملت حال السوشيال ميديا… ح تلقى ناس كتار راكنين مشاكلهم الشخصية وبند بناء حياتهم على جنب… وداخلين معارك ما عندهم معاها أي شغلة.
والله جد…
زول داخل معركة لمن جاتو أعصاب عشان فنان … لو الفنان دا شافو في الشارع ح يسألو: “إنت منو؟”
وزول مستعد يسهر لحدي الفجر عشان يثبت ليك إن المنتخب الفلاني كان مفروض يلعب بثلاثة مهاجمين بدل اتنين.
دولة في الخريطة ما شافها زي الناس…
في حصة الجغرافيا… جاب فيها صفر…
لكن في السوشيال ميديا تحسبه سفير فوق العادة لهذه الدول …
والله جد…
السوشيال ميديا بقت فيها ظاهرة (مقاتل بالإعارة)
يقاتل نيابة عن الفنان… ويغضب نيابة عن اللاعب… ويخاصم نيابة عن الدولة… ويزعل نيابة عن الحزب… وصاحب الشأن الحقيقي نايم ملء جفونه، و( لا درى عنك)
وهسه شربنا الشاي….
عارف كل مشاكل صانع المحتوى فلان الفلاني
وتاريخ حياة فلانه الفلانية
لكن ما عندو ربع ساعة يركز مع حياتو … ماعندو ساعتين يشوفو مشاكلو الشخصية ويفكر يعالجها..
هواية البعض صارت ( يفتشوا أي منشور… عشان يلقوا معركة يدخلوا فيها)
لو كتبت الصباح جميل…
يقول ليك : واضح انك قاصد تقلل من قيمة المساء…
واخر يكتب : الكلام دا إساءة للناس الساكنين في المناطق الباردة…
والتالت يقول ليك: اها .. عرفنا انتماءك..
وبعد خمس دقائق تلقى التعليقات وصلت مرحلة مجلس الأمن.
عدم شغلة عجيب ..
والله جد…
ناس بتتعامل مع اي منشور كـ إعلان تعبئة عامة.
وأي بوست لازم ينتهي بانتصار ساحق أو هزيمة تاريخية.
أغرب حاجة إنو الناس ديل لو طلبت منهم يتطوعوا في حاجة مفيدة .. ح يتذكروا إنهم ما بحبوا يدخلوا في شؤون الآخرين.
لكن أول ما تقوم شكلة بين جمهورين، أو بين دولتين، أو بين فنانين… يتحولوا إلى قوات تدخل سريع
قوات إلكترونية….
أي زول شايل موبايلو كأنو شايل مدفع
عليه أمشِ شوف معاركك الحقيقية …
يمكن تلقى حلم مؤجل… أو أمّ محتاجة مكالمة…
في النهاية… أكثر الحروب استنزافاً، هي الحروب التي لا تربح منها شيئاً… غير استهلاك البطارية وباقة الإنترنت وأعصابك وصحتك
و ……
شوف شغلتك وين
لدواعٍ في بالي
