هناء إبراهيم تكتب : هواء… بالتقسيط!
فوق راي..
والله جد…
ربما مر عليك خبر أو معلومة أن هناك قرى سياحية بتبيع الهواء في عبوات..
كـ قرية هالشتات بالنمسا…
شركة متخصصة…
يعبوا الهواء في علب، ويكتبوا عليها: “هواء نقي أصلي”… ويبيعوا العلبة بعشرة يورو…
وكمان بخلص سرعة من السوق… وممكن تطلبوا من دول اخرى وبجيك مع سعر الشحن… وقصة
و العلبة فيها ستين نفس فقط …
اتفرجتوا…؟!
يعني النفس الواحد أغلى من وجبة فول…
المخيف إنو البشرية لو واصلت بنفس سرعة الابتكار دي، قريب جداً ح نشوف إعلان
(عرض خاص… اشترِ شهيقاً واحصل على زفير مجاناً)
مجانا انت دا….
وتقوم حرب بين تجار النفس النقي وتجار المخدرات …
حرب الهواء ضربنا …
وهسه شربنا الشاي…
يمكن تفتح الشباك تلقى رسالة: هذا الهواء غير مرخص للاستخدام…
والشفع ياخدوا من أهلهم مصاريف الأوكسجين…
وناس الكرم يضبحوا ليك
ويقول ليك : اتفضل… شيل ليك نفسين على حسابنا…
أما السوداني… فأنا مطمنة عليه…
لأنو نحن أصلاً شعب متعود على الاقتصاد…
لكن أخاف يجي يوم المطارات تفتش الشنط وتلقى زول مهرب خمسين نفس من النمسا!
وتلقى في السوق الأسود إعلان:
هواء أوروبي… استعمال خفيف… لم يُستنشق إلا عشر مرات…
والله جد…
آخر نفس… بالتقسيط المريح!
بالمناسبة… لو الهواء بقى سلعة رسمية، فنحن عندنا مشكلة أكبر…
لأنو في ناس قاعدين ينشروا في وسائل التواصل كمية من الهواء الساخن تكفي لتشغيل محطة كهرباء كاملة!
يبدو إنو الاقتصاد العالمي ما خلّى حاجة إلا وسعّرها.
باقي فقط يحددوا ضريبة على الضحك… ورسوم على الابتسامة… ورخصة سنوية للدموع…
وقتها… أي زول زعلان ح يكتفي بكتمة في قلبو…
لأنها آخر حاجة لسه… مجاناً…
و….
الهوى هوانا
لدواعٍ في بالي
