نائب رئيس الجمهورية ووالي شمال دارفور السابق في (قيلولة) حافلة على (منصة العودة) (2_3)

د. كِبِر: الحصل في الفاشر ما حصل في أي مكان في السودان

الدعم السريع ارتكب أخطاء جسيمة وفظائع أكبر من الإبادة الجماعية

التنكيل عندو بُعد نفسي.. وهذه هي أسباب سقوط الفاشر

///////////

رصد: علي هباش

//////////

في الحلقة الثانية من حديث الدكتور محمد عثمان يوسف كبر، نائب رئيس الجمهورية سابقاً ووالي شمال دارفور سابقاً ورئيس مجلس شورى المؤتمر الوطني حالياً ورئيس المشروع السوداني للسلام الاجتماعي، حلَّ ضيفاً عزيزاً وثقيلاً في مكانته بالسودان كرجل وطني وقامة ورمز قومي معروف، على برنامج “قيلولة” الذي تقدمه الزميلة الإعلامية والصحافية الأستاذة منى أبو زيد، على (منصة العودة) باليوتيوب، نقدم سرده وتعليقه على أحداث مدينة الفاشر والفظائع التي ارتكبتها مليشيا الدعم السريع الإرهابية وأسبابها، وأسباب عدم إدانتها حتى الآن جراء هذه الانتهاكات والجرائم، من قِبل المجتمع الدولي، كما كشف الدكتور محمد عثمان يوسف كِبِر عن الهدف من حملة جمع السلاح، عبر المساحة التالية نتابع:

///////////

في رأي أيضاً سمعناه نقلاً عن بعض الخواجات المهتمين بالشأن الدارفوري سياسياً أو تاريخياً بتكلموا عن إنو طبعاً ما في قبائل أفريقية في دارفور كان عنوانها قبيلة في مواجهة العرب الفي دارفور زي قبيلة الزغاوة وهناك آراء أُثيرت مؤخراً إنو الخواجات يعني هو رأي شوية كده فيهو التفاف لكن شوية كده فيهو فلسفة كده نشوف رأي حضرتك فيهو .. إنو الخواجات دعموا الدعم السريع عشان دارفور ما تكون تحت قبضة الحكم المركزي لأنهم عايزين ثروات معادن طامعين في أشياء أخرى من هذا القبيل، فقاموا دعموا الدعم السريع تمهيداً لمعاقبته وإعادة الحكم في دارفور لقبائل إفريقية وبقيادة قبيلة الفور تحديداً .. كيف تقرأ هذه القصة ..؟

أنا بقول لو قريناها من زاوية بتاعة تحاليل التوقعات تقدر تقول فيهو منطق ومقبول بالواقع القدام الناس، لكن النظرة التانية الأنا شايفها صحيح جداً جداً يكاد يكون الخواجات بصفة عامة ساندين للقبائل النن أربس، والشاهد أنا كما قلت في السابق 2003 لما حصل التمرد في دارفور السند القوي الكان بالنسبة لدارفور في كل حركاتها المكونة كان من الخواجات، والسند العكسي اللي هو من وقتها الدعم السريع كان من الحكومة السودانية، والخواجات كانوا ضد العرب (100%) دايرين بأي حال من الأحوال يفصلوا دارفور بما فيهم قرنق ساهم وحاجات كتيرة جداً، ده التقسيم الكان واقع لكن بالنظرة الهسه حصلت كانوا يمتطوا أو يدفعوا العرب إنهم يصلوا عشان يحكموهم، لكن أنا داير أقول إنو بالواقع الأنا شايفو انقلاب رأي الخواجات أو رؤية الخواجات بصفة عامة أو نقول عليهو المجتمع الدولي إن صحت العبارة من الكلام العام البقولوا الناس، المجتمع الدولي ده لحدي ما سقطت الفاشر ما كان مُرّكِز وما كان مهتم كتير بدارفور، لكن حيثيات سقوط الفاشر وأنا بفتكر إنو الدعم السريع أكبر خطأ ارتكبه الممارسة التمت في الفاشر، الفاشر صاح حصلت فيها ممارسة سيئة جداً وقبل الفاشر في مناطق كتيرة في السودان لا نستطيع أن نبطلها حصل فيها من السلوك السيء للغاية، قاطعته المقدمة: منذ مقتل الوالي خميس أبكر والتنكيل بجثته بدأت الأحداث، رد عليها: من الجنينة والجزيرة وهكذا وكردفان وحتى الخرطوم ذاتها صحي جداً سلوك سيء جداً، لكن ده كلو لو لاحظتِ ما خلَّ المؤسسات الدولية من مجلس الأمن والأمم المتحدة ومنظماتها ما وصلت لمرحلة إنها تدين الدعم السريع أو تدين فعله ..

السر شنو في الفاشر ..؟

الممارسة الحصلت من الدعم السريع، أنا أفتكر إنو الدعم السريع أخطأ جداً في السلوك الحصل، والسلوك كان منقول على الهواء منهم هم نفسهم، فالخواجات ديل نفسهم ما عندهم حل غير إنهم لازم يدينوا الموقف ده، فسقوط الفاشر والممارسات الحصلت هي القلبت على ناس الدعم السريع، قاطعته المقدمة: لتاريخهم في دعم القبائل العربية في دارفور؟، أجابها: أيوة ..

أنا عندي سؤال فرعي هنا إذا كان الموضوع تصوير طبعاً هم درجوا على أنهم يصوروا طيب ما حدث في الجزيرة ود النورة كانوا بصوروا المجازر والفظائع والحاجات دي كلها .. لماذا لم يتحرك المجتمع الدولي إلا بعد سقوط الفاشر كما ذكرت هل ده لتاريخ المجتمع الدولي في دعم القبائل الإفريقية في دارفور؟، ما ديل برضو سودانيين وديل سودانيين؟

صحيح، طبعاً ده سؤال بالنسبة للمراقب ممكن يقول منطقي وصحيح جداً، لكن داير إنو الذي حدث في الفاشر صحيح ود النورة حاجة كبيرة صحيح الجزيرة صحيح الجنينة نفسها في دارفور وبرضها حصلت حاجة كبيرة، لكن الذي حصل في الفاشر حتى هذه اللحظة النحن بنتكلم فيها دي حقيقتو لم تظهر بعد، الفاشر دي حصلت فيها أشياء أصلاً ما يتخيلوها الناس، لقدام كده لما تظهر الحقيقة ح تلقى حاجة تذهل كل الناس، حصلت فيها ممارسات سيئة أصلو ما حصلت في أي مكان، قاطعته المقدمة: أفظع من الإبادة الجماعية؟، رد عليها: الإبادة الجماعية دي فاتوها بفارق بعيد جداً من المستوى، فحقيقةً؛ هُم لأنو الخواجات كانوا مراقبين لو بتتذكري جامعة في أمريكا كانت متابعة الموضوع بالأقمار الصناعية ومصورة حاجات كتيرة جداً جداً، انا حاسي إنو ملفات كتيرة جداً ما أظهروها، فحقيقة الأمر الذي حدث في الفاشر أوقف كل حكاية التحايل رغم إنو الفاشر نفسها صدر فيها قرار، الفاشر كانت محاصرة لمدة 515 يوم كل الحصار ده صدر فيهو قرار من مجلس الأمن الدولي بإنو ينهوا الحصار ده، لكن ما استجابوا وما اشتغلوا بعدم الاستجابة ولا شيء لحدي الليلة نحن بنتكلم برضو، ما حصلت إدانة يعني ما حصل تصنيف بإنو الدعم السريع مرتكب الفظائع بالشكل المعروف جرائم الإبادة الجماعية والتطهير العرقي وغيرو، لأنهم شافوا نفسهم مضطرين يعملوا كده لقوا نفسهم يصلوا مع التراكم الحصل مع الأحداث، يعني ديك برضها كلها جزء من الكوب ده لحدي ما امتلأ ووصل للمستوى بتاع الإدانة ..

إن جاز السؤال هل بإمكاننا أن نسأل حضرتك عن التسبيب.. نحن اتكلمنا عن المظاهر وعن تمشهورات الإجرام ده ليه تحديداً هنا _الفاشر_ وبالطريقة البشعة دي ..؟

أنا حاسي إنو أول حاجة من الموقف الحصل من أهل الفاشر والموقف الحصل من الفرقة السادسة ذاتها اللي كانت موجودة في الفاشر، والعناد الشديد جداً جداً في المقاومة وعدم السقوط، لأسباب كتيرة جداً جداً، يعني هُمَّ حاولوا محاولات يعني.. من المرات عشان يقتحموا عجزوا في إنو هُمّ يسقطوا الفاشر عشان كده اضطروا لأنهم يحاصروها، الحصار برضو امتدت لفترة طويلة جداً جداً فيبدو إنهم جايين وعندهم شوية غِلْ كده على الشيء الحصل وحتى بالنسبة للحصل للناس، قاطعته المقدمة: التنكيل ده عندو بعد نفسي، رد: عندو بُعد نفسي أظنو كده لأنهم في النهاية ما في سبب بخليهم يتصرفوا كده، لأنو في النهاية هم أهلهم ذاتهم جوه الفاشر ..

هنا في محطة أخرى نريد التوقف فيها .. في الوقت داك كنت والي شمال دارفور في حملة جمع السلاح القام بيها د. حسبو عبد الرحمن، يُقال إنو هذه الحملة كان الهدف جمع السلاح من القبائل الموالية لموسى هلال من أجل التمكين لحميدتي وقتها .. رأيك شنو في الكلام ده ..؟

هو طبعاً الكلام ده ما جديد، الكلام ده قيل حتى أثناء جمع السلاح باعتبار إنو حسبو منسوب لنفس أسرة حميدتي، لكن أنا بما أعلمه القصد ما كان كده، عندي شهادة وأنا أقولها يعني وأنا والي ورئيس لجنة الأمن في الولاية المعنية، فأنا حاسي إنو هي دي واحدة من التحليلات القصد منها الزول لما تبدا تحللو بتربط حاجات كتيرة جداً عشان تحللو تحليل دقيق، لكن للأمانة أنا ما حسيت ولا اقتنعت بالممارسة الحصلت إنها كانت مقصودة لمرحلة جاية، يعني الناس كانوا بيفتكروا إنو جمع السلاح تمهيد لما حدث الآن، أنا ما اتفق مع الرأي ده، افتكر أن جمع السلاح كان هدف لذاتو، هو جمع السلاح ما كان شمل غير دارفور حتى، كل السودان يعني بعد داك، لأنو كان في تحديات النهب المسلح والمشاكل القبلية كان استعرت في أماكن كتيرة جداً، فكان في تحديات كافية إنو يجمعوا السلاح الحكومة نفسها كان عشان تفرض هيبتها كان من الضرورة أنها تحد من انتشار السلاح بالشكل المطلوب، لأنو واحد من الأسباب الأساسية للمشاكل الهسه حاصلة ولفتنة دارفور نفسها في 2003 واللي اسست لحدي ما وصلت لـِ دي، واحد من أسبابها انتشار السلاح وسط المواطنين، النهب المسلح بدأ تطور بسلوك بسيط جداً بعد داك تزايد لافتتاح الحدود تزايد لانتشار السلاح أسباب كتيرة جداً مع بعض من ضمنها سهولة دخول السلاح سهولة امتلاكه.