الأمين العام لاتحاد المهندسين السودانيين في (رحلة أمل) على (منصة العودة)

المجلس الهندسي هو من يمثل الدولة ويقوم بدور الحاكمية

 اتحاد المهندسين كيان أشبه بـ(النقابة)

الناس بتتحدث عن الإعمار بـ(عواطف جيّاشة).. والهندسة لمساتها ظاهرة في كافة أنشطتنا 

///////////

رصد: علي هباش

////////////

استضاف برنامج (رحلة أمل) الذي يقدمه الزميل الإعلامي عماد البشرى، على (منصة العودة) باليوتيوب، البروفيسور أمين بابكر عبد النبي، الامين العام لاتحاد المهندسين السودانيين وعميد الكلية الأردنية السودانية للعلوم والتكنولوجيا، في مشوار هندسي حافل تطرق فيه الأخير للعديد من الجوانب الهندسية ومدى أهمية الهندسة في الحياة والسودان بشكل أدق، حيث تناول موضوعات عُدة، لكننا قطفنا منها الجزء الأبرز فيما يتعلق باتحاد المهندسين السودانيين وطبيعة عمل المهندسيين والرد على اتهام المهندس السوداني بالبطئ في إنجاز عمله .. عبر المساحة التالية نتابع حديث البروفيسور أمين بابكر الذي جاء واضحاً ودقيقاً ..

////////////

بروف أمين لما نتكلم عن اتحاد المهندسين معناها بنتكلم عن بناء حقيقي قبل ما نمشي لفكرة البناء الحقيقي لاتحاد المهندسين ودور المهندس في الإعمار .. إلى أي مدى نقدر نقول الهندسة هي عِماد بناء الدولة ..؟

طبعاً الهندسة حقيقة بطبيعة المجالات البتشملها عندما نتحدث عن الهندسة نتحدث عن الإنشاءات نتحدث عن الكهرباء نتحدث عن الصناعة نتحدث عن البُنى التحتية نتحدث عن التعدين، يعني كل الأنشطة النحن ممكن نصنفها بأنها أنشطة بتخدم الاقتصاد وقبل كده هي الأنشطة البتخدم البشر بصورة عامة، بتلقى إنو الهندسة لمساتها ظاهرة حتى لو بدينا بالمهن القريبة من الهندسة إذا تحدثنا عن الزراعة إذا تحدثنا عن الطب، فالأدوار البتقوم بيها كل هذه المهن حقيقة لا تكتمل إلا بالاعتماد على كتير جداً جداً من المعينات الهندسية، وبالتالي بنقدر نقول إنو الهندسة تدير الكثير جداً من الدروس، تدير الاقتصاد وكذلك تُسهم حقيقة في ترقية حياة الإنسان حقيقة لأنها هي أصلاً تعريف الهندسة ابتداءً هو العلم البيعمل على تطويع العلوم الطبيعية الحديث عن الكيمياء والجيلوجيا والفيزياء وعن كذا وكذا، تطويعها وتوظيفها في خدمة الإنسان بتيسير حياته وبتحسين تفاصيل حياته المختلفة، ده بيتمدد شيئاً فشيئاً لحدي ما نصل لمرحلة إنو هي فعلا الهندسة تعنى بكل الدروس التي تُدير الاقتصاد وبالتالي نتحدث عن شكل ومستوى حياة الإنسان بصورة عامة، وبالتالي بنلقى إنو نحنا في كل أنماط حياتنا في كل أنشطتنا بنلقى إنو ما من مساحة إلا وتتمدد فيها الهندسة بأي شكلٍ من الأشكال ..

طيب خلينا نمشي هو ما اتهام ولكن تساؤل مهم جداً يعني ما بعد الحرب تم ترميم بنية تحتية وزارات جسور حتى الطرق والغالب على الشخصية السودانية بقول ليك ليه ما اتعاقدوا مع شركات أجنبية لإعمار هذه مثلاً الجسر الفلاني نجيب إكس من الدول المستشفى الفلانية نجيب إكس من الدول بعد داك بتبزغ شهادة الناس حسب شهاداتهم خارج السودان يعني زول مثلاً مشى السعودية داير التجربة الخليجية مشى جمهورية مصر العربية داير تجربة المحاور والطرق .. فهل القصة دي عدم ثقة في المهندس السوداني ولّا في تقديرك إحساس بإنو في سرعة بتاعة أداء أو في ممكن يكون اتهام للمهندس السوداني بإنو بطئ ..؟

ده سؤال كبير جداً؛ ده سؤال قد لا ينسحب فقط على الهندسة يمكن كتير جداً من تفاصيل حياتنا في السودان إذا عايزين نتحدث عن التفاصيل الليها علاقة بالإدارة في كل المجالات، دايرين نتحدث عن السياسة عن تنظيم حياتنا في أشكال كتيرة جداً، بنلقى إنو في شيء من عدم الالتزام بمطلوبات التعامل حيال الملف المعيَّن، ودي برضو ممكن تكون موجودة في الهندسة، الأفراد البتحدثوا بانطباعاتهم بالتأكيد كل واحد إذا كان هو بعيد عن مجال الهندسة يتحدث بانطباعه ويدخل تجربتو الشخصية العاشها خارج السودان في دولة من الدول بكون من الملهمات التفاصيل الخاصة بالتجربة العاشها، واللي برضو الموجود جوه السودان وكان تفاصيل حياتو مربوطة بمرفق من المرافق أو عاش في منطقة فيها عمل تعديني أو منطقة فيها تكرير بترول أو منطقة في منشأة ليها علاقة بالكهرباء بكون مأخوذ بالتفاصيل الشكلت جزء من حياتو خاصة إذا كان هو بعيد عن الهندسة، لكن حقيقة الكلام ده كلو بيقود لخلاصة مهمة جداً إنو نحن يجب أن نتعاطى مع الأشياء الليها علاقة بالمشاريع بإعادة البناء بـِ كذا بقدر عالي جداً جداً من العلمية ومن المؤسسية بحيث إنو يجب ألا تكون هذه التفاصيل حقيقة خاضعة للتجارب والانطباعات والأهواء، دي علوم ونحن العلوم دي مش نمشي نعيد اختراع العجلة في ما يتصل بالملفات الزي دي، الأشياء دي مكتوبة وموجودة ومحسوبة بس نحنا مفروض نرتب أنفسنا بما يكفي عشان نقدر نتعامل مع الملفات دي بالصورة البتستحق، يعني الليلة الناس بعواطف جياشة جداً تتحدث عن إعادة الإعمار وتتحدث عن إنو والله ملف النقل البري يجب أن يكون فيه كذا وكذا ما عارف في السكة حديد يكون فيها النقل النهري والنقل الجوي وموقع السودان، يعني في ملفات .. التصنيع الحديث عن تصدير المنتجات خام ولّا تصنيعها فالكلام ده كلام حقيقة بيدور ولكن بمشاعر صادقة جداً وبحيز كبير جداً لكن إذا لم تكن العلمية هي المرجع إذا لم تكن المؤسسية هي المرجع إذا لم تكن القواعد والأسس وأبجديات التعامل مع العقل الهندسي حاضرة فنحنا سنتنكب الطريق بلا أي شك، وده الواحد بيقودو حقيقة يعني جرت كثير من المياه تحت الجسر لكن لازلنا وعبر منابر مختلفة نتحدث عن إنو المسألة الخاصة، يعني نحن لا نتحدث عن مسألة الإعمار لأنو في ملفات كتيرة جداً وفي منافذ كثيرة جداً ما كانت تستوفي الحدود الدُنيا من المطلوبات، نتحدث حقيقة في إنو ما حدث ده ممكن يكون فرصة نعيد بعث الحياة بكل تفاصيلها بمرافقها المختلفة بخدماتها المختلفة بـِ كذا، على أسس علمية جديدة عشان نكون نحن فعلاً في المستوى البشبه المكان البنستحق إنو نكون فيهو السودان بلد حضارة ضاربة في جذورها في التاريخ وبالتالي نحنا أول صناعة على وجه الأرض بتاعة حديد كانت في السودان وأول وأول ولك أن تعدد المنشآت والحديث عن الأهرامات وعن كذا وكذا، فالمسألة دي حقيقة بتخلينا نحن أمام تحدي كبير جداً جداً إنو نحنا أمة فعلاً بتاريخها وبكسبها وبكثير من التفاصيل تستحق على الأقل إنها تُعمِل مطلوبات العلم والأسس الخاصة بالقواعد القياسية لإنجاز العمل الليهو علاقة بإعادة الإعمار ليهو علاقة بالتنمية بأسس علمية تكون مستوفية كل المطلوبات بصورة قياسية، عشان كده أنا قلت ليك الواحد يُشفِق إنو الناس تتعامل مع كثير من الملفات بشيء من الحماس والتبسيط، وهي الأمور تتطلب قدر كبير جداً من الالتزام بالعلمية المطلوبة عشان نحقق المأمول على أفضل نحو ممكن ..

ألمح من كلامك ده جزئية صعبة جداّ إذا حاولنا نقيف عندها اللي هي كثير جداً من المشروعات الممكن تكون الدولة انشأتها في أوقات سابقة دون ذكر حقب لم تقم على استشارات هندسية حقيقية والواضح إنو أي إنشاء سواء كان الحاجة الانت بتعملها الـ(Structure) ده البناء ده لازم يكون في معايير هندسية دقيقة جداً للمسألة دي فمرات بنشوف إنو والله ياخي تم القفز على الاشتراطات الهندسية الاتكلمت عنها في مرافق كتيرة جداً يعني أنا بستغرب إنو بيتم بناء مثلاً برج يتعلق بمنشأة حكومية وما يتوفر ليهو مثلاً باركينغ وده اشتراط أساسي أو مثلاً في السنوات الأخيرة بدت مسألة المصاعد دي .. فإلى أي مدى نقدر نقول إنو الهندسة كعلم واتحاد المهندسين برضو ما كان موجود في كثير جداً من التفاصيل العندها علاقة بالإنشاءات في الفترات السابقة ..؟

هو طبعاً المؤسسات والمنشآت ظهرت في حقب مختلفة وفي ظروف مختلفة، بالمناسبة في كثير من المؤسسات والمنشآت يعني لو دايرين نرجع للفترة بتاعة الراحل جعفر نميري عليه رحمة الله؛ في كثير جداً بالمناسبة من المشروعات وهي كانت قائمة على التعاون مع دول أخرى، وكانت حققت حظ من النجاح بمعايير ذلك الزمن تستطيع أن تُقدر الجهد البُذِل في مصانع السكر في كذا، قاطعه المقدم: في قاعة الصداقة وقصر الشباب والأطفال، أجاب: دي أشياء قامت عبارة عن ملامح تتناسب مع تلك الفترة وتلك الحقب، لكن طبعاً الآن الظروف غير وبالتالي يجب أن نتعامل بما توصل إليه الإنسان من إنسانية من علوم من تجارب خاصة وأنه السودانيين عندهم كسبهم وعندهم دورهم الكبير جداً جداً في المنطقة العربية ويمكن الناس ملَّت الإشارة لإنو السودانيين ساهموا في تطوير الحياة الهندسية في الدولة كذا والدولة كذا، فده حقيقة بيقود ويشير إلى إنو نحنا قادرين نعمل الأشياء بالمعايير المطلوبة، طبعا الإشارة لاتحاد المهندسين، اتحاد المهندسين طبعاً هو في النهاية كيان يعني حاجة أشبه بالنقابة، الكيان البيجمع المهندسين وهو يرعى شؤون الممتهنين المهنة يعني المهندسين سكنهم ظروف حياتهم علاجهم دي الشواغل الأساسية للاتحاد ولكن الممتهنين أو المهندسين كممتهنين ومنضويين تحت لواء الاتحاد هم كذلك ممكن يكون في فرصة لإكسابهم المزيد من المعارف والخبرات عبر التدريب عبر اتاحة فرص للدراسات في مستويات أعلى، وهُم في النهاية فصيل مهم جداً لأنو هم عبارة عن كيان بيجمع مجموعة كبيرة جداً جداً، هو الكيان الأشمال البجمع مجموعة كبيرة جداً جداً من المهندسين على صعيد واحد، صحيح هو ليس بالمؤسسة الوحيدة لأنو المؤسسة الحكومية في البنية الهيكلية بتاعة الدولة عن إدارة أو مراعاة القيام بدور الحاكمية في ما يتصل بالعمل الهندسي هو المجلس الهندسي، يعني المجلس الهندسي كيان آخر حقيقة أنا أتشرف بعضوية المجلس الهندسي السوداني، هو ده الكيان اللي بمثل الدولة وبالتالي هو مهموم بإنو يقوم بدور الحاكمية بكل ما يتصل بممارسة العمل الهندسي سواء كان عمل مهني أو كذا، لكن في النهاية طالما كان اتحاد المهندسين هو كيان يجمع قدر كبير جداً من المهندسين فده بيعني إنو ممكن يكون عندو دورو، ممكن يعمل على رفد الدولة بالخبرات والمعارف والكوادر اللي ممكن يكون فعلاً عندها قدرات عالية جداً ممكن تُسهم في أن تُشكل الحاضر وتعمل على صياغة المستقبل وفق الأسس والقواعد العلمية القياسية المطلوبة.